RADIOAMATORO

2020-01-12

Feliĉan novan jaron 2020

Ni ĵus alvenis al 2020 kaj kun tiu ĉi nova jaro novaj defioj aperas. Por mi unu el ili estas daŭrigi tiun ĉi blogon sed ankaŭ rilate al amatora radio ja reaktivi en radioamatoraj konkursoj^(vikipaĝo) estas inter la ĉefaj defioj. Kompreneble esti iom pli aktiva etere estus bone!

Feliĉan novan jaron 2020 de radioamatoro.blogspot.com

Post unujara blogo (kaj iom plu) ĝi daŭre restas aktiva, almenaŭ unufoje monate mi ion verkas kaj entute jam estas pli ol 100 artikoloj ĉi tie. Kompreneble subteni blogon (despli se faka kaj en Esperanto) estas defia laboro, kiu tute ne malkuraĝigas min. Por mi tute ne gravas ĉu estas tri aŭ milionoj da legantoj, kio gravas por mi estas iom alporti al la e-komunumo kaj pli specife al ala e-radioamatoroj nunaj aŭ ontaj, kiuj iel povus uzi miajn spertojn. Sur baze de tio mi deziras al ĉiuj feliĉan novan jaron kaj daŭrigu ĉe la blogo!

💚💞 Feliĉan novan jaron 2020 🍧🍹🎂

2019-12-20

Filmoj pri Amatora radio ĉe mia listo letterboxd

Filmoj pri amatora radio ja aperis tra la jaroj. Lastatempe ekaperis intereso pri la temo ĉe pluraj membroj de ILERA, francoj projekciis la kuban filmon "Sergio & Sergei" kaj ĉe la diskutlisto Maxime Thiébaut demandis pri subtektigo de "Si tous les gars du monde..." ^{(vidu ĉe la diskutlisto)}. Interese ĉar li ricevis pluraj respondoj eĉ kuraĝuloj pretis kuntraduki la filmon.

Listo de filmoj pri amatora radio ĉe Letterboxd

Mi kreis liston de filmoj pri amatora radio ĉe letterboxd. Ĝi estas iuspeca retejo aŭ socia reto por filmoj kaj filmŝatantoj en kiu oni kreas kaj kundividas filmlistojn, deziratajn filmojn, klasifikitajn filmojn laŭ ĝenro, jarapero, reĝisoroj, aktoroj...

Vidu mian liston pri amatora radio:
https://letterboxd.com/radioamatoro/list/radioamatoro-amateur-radio-radioaficion/

La filmo estas elŝutebla (espereble daŭre) ĉe:
https://peertube.dk/download/videos/21af8c8c-7827-4ad4-bec4-a88fd2be2311-556.mkv
(1 GB)

Iru kaj rigardu la liston, ne forgesu informi al mi pri pliaj mankantaj filmoj en tiu listo!!!!

2019-11-30

La blogo en HamRadioWebsitesWorld

Post longa klopodo kaj pluraj mesaĝoj la radioamatoro aperas en la blogaro hamradiowebsitesworld.blogspot.com, kiu kolektas ligilojn al multaj radioamatoraj blogoj.

radioamatoro.blogspot.com en la blogaro hamradiowebsitesworld

Iru kaj esploru, eble estas io interesa en ĝi!
Vidu longan liston de radioamatoraj blogoj tie, fakte plurlingaj inter kiuj ankaŭ estas e-radioamatora blogo!!!
http://hamradiowebsitesworld.blogspot.com/
ĝi aŭtomate aktualiĝas pere de la RSS de la blogoj tiel ke vi aŭtomate vidos mian lastan blogaĵon tie. 😄

2019-11-12

Du versioj de sama foto

Inter la unuaj informoj, kiujn mi havis pri e-radioamatoroj el/en Kubo estis eta bildo de lasta paĝo de ILERA-bulteno sendita al mi de Wolf/DL1CC. En ĝi flave aperis foto de maldekstre lan Mac Dowall (GB-SIAIL), Pedro Rodriguez/CO2RP (Prezidanto de la FRC [Federación de Radioaficionados de Cuba]) kaj Wolf Kruger/DL1CC. Kiel kuriozaĵon oni mencias Fidel Castro, kiu aperas malantaŭe (en iu bildo).

e-radioamatoroj en la sidejo de FRC, Kubo 2004

Post multaj jaroj kaj tute hazarde Wolf resendas al mi similan foton sed ĉi foje iom pli altkvalita kaj plenkolora kvankam skanita. Tiun foton oni faris okaze de vizito al la FRC (Federacio de Radioamatoroj el Kubo) dum la 6a TAKE (6-a TutAmerika Kongreso de Esperanto) en Havano, 2004.
La lasta sendita dokumento de Wolf, temas fakte pri retmesaĝo al Anatolij/UA9UNK.
Danke al tiu vizito oni perfekte sciis pri Esperanto en la sidejo de FRC kaj tio multege faciligis niajn demarŝojn por oficialigi nian specialan e-radioklubon CO9BNN en 2012! Fakte Pedro memoris pri tiu okazaĵo kaj iom babilis pri la temo kun ni 😃😄

Lasta paĝo de ILERA-bulteno 2004

Pliaj fotoj de radioamatoraj esperantistoj en Pinterest ^(TTT)
Gugla fotaro pri historio de e-radioamatorismo ^(TTT)

2019-10-11

Donaco de SDR elektronikeroj

Jam de multaj jaroj mi esploras kaj eksperimentas kun SDR (Software Defined Radio) en Esperanto mi ne vere scias pri la traduko eble Softvare Difinita Radio por iel respekti la metrikon/komencliterojn. Fakte mi eĉ konstruis ekzempleron sed pri ĉiuj ĉi miaj esploroj mi iam verkos ĉar vere temas pri ammpleksa temo al kiu mi dediĉis multege da mia tempo.

Elektronikaj komponantoj por SDR

Antaŭ kelkaj semajnoj alvenis pakaĵeto al nia radioklubo danke al donaco de 2 esperantistoj.

Udo Isaenko/HB9ERD

Miroslav Malovec

Ili jam delonge interŝanĝas kun mi pri pluraj temoj sed ja pri SDR Udo multe scias. Li mem uzas ilin ĉe sia radioĉambro pri kio vi povas vidi plurajn fotojn en QRZ.com ^(TTT). Miroslav siaflanke laboras en vendejo por radioamatoroj tiel ke li perfekte scias pri kio temis tiuj elektronikaj komponantoj 😀👌
Nun mi eklaboras en finkontruo de sendricevilo por nia kluba stacio CO9BNN, kiu ĝis nun ne havas HF stacion. La pakaĵeton portis Rogelio, laboristo de KEA, kiu restis kun sia filino dum kelkaj monatoj en Svizlando kaj afable portis ĉion al ni.
Entute ili sendis icojn (Integritaj Cirkvitoj) por munti/krei 3 sendricevilojn. La ceteraj elektronikeroj ja estas relative facile troveblaj en Kubo. Bedaŭrinde ĉe ni estas neniu (vere neniu) vendejo por tiaj komponantoj. Plejparto el ĉio, kion ni uzas estas recikligitaj komponantoj.